Россия бастыҥ оскуолата

Республикатааҕы истибэт оҕолор оскуолалара Россиятааҕы «Аныгы Россияҕа үөрэтии-иитии проблемалара уонна инникилэрэ» форумҥа «Үөрэтэр программалары адаптациялыыр бастыҥ үөрэх тэрилтэтэ-2017″ куонкуруска Лауреат аатын ылла.

Бу куонкурус сүрүн ирдэбиллэрэ: үөрэх аныгы программатын олоххо киллэрии уонна сайыннарыы көдьүүһэ, үөрэнээччилэр үөрэх таһынан туһалаах дьарыктара, аныгы (ол иһигэр, информационно- коммуникационнай) технологиялары туттуу. Бу үөрэтэр-иитэр оскуола-интернат коллективын өр сыллаах үлэтин түмүгэ. Доруобуйаларынан мөлтөх, истибэт буолан хааччахтанан төрөөбүт оҕолорго учууталлар, үлэһиттэр сүрэхтэрин сылааһын биэрэн, болҕомтолорун толору ууран, бириэмэлэрин харыстаабакка сылдьыбыт түбүктэрин түмүгэ.

Неватааҕы үөрэх ассамблеята » Эдэр салайааччы-2017″ бэлиэтин оскуола дириэктэрэ Оксана Винокуроваҕа туттарда. Үлэлэрэ сыаналаммыт истиҥ наҕараадатын научнай-методическай уонна инновационнай үлэҕэ директоры солбуйааччы Сардана Васильевна Третьякова Санкт-Петербург куоракка үөрүүлээх мунньахха кыттан дойдутугар аҕалла.