Өксөкүлээх Өлөксөй — саха былыргы олоҕун чинчиһитэ
Саха норуотун былыргы олоҕун сирийэн, чинчийэн үөрэппит, оччотооҕу кэм чөл куттаах битин- билгэтин, үгэстэрин, харысхалларын, таабырыннарын- норуот уус-уран айымньытын араас көрүҥүн сурукка-бичиккэ тиһэн үйэлэргэ сүппэт Мэҥэ тааһын олохтообут, саха норуотугар уус-уран литература үөскээһинин Алгыһынан амалыйан саҕалаабыт бөдөҥ учуонайбыт, фольклориспыт, норуотун инники дьылҕатын «тымтыктанан көрбүт», онно сирдьит эркээйилэри охсубут общественнай деятельбит Өксөкүлээх Өлөксөй Орто дойдуга уол оҕо буолан ортотунан курданан, оройунан түһэн, төрөөн-ууһаан, Таатта талыы хонууларынан күөлэһийэн ааспыта 140 сыла буолбут.
Өксөкүлээх бэлиэ күнүн кини аатынан культура дьиэтигэр кулун тутар 16 күнүгэр төрөөбүт норуота бэлиэтээн ааста. Үөрүүлээх мунньахха СР Правительствотын бэрэссэдээтэлэ Е.Чекин, Ил Түмэн судаарыстыбаннай мунньах бэрэссэдээтэлэ А. Жирков, судаарыстыбаннай сүбэһит, П.А. Ойуунускай уонна А.Е. Кулаковскай бириэмийэлэрин лауреата А. Борисов, суруйааччы сиэнэ Р. Кулаковская, Алтайтан ыалдьыппыт, суруйааччы Б. Бедюров, Таатта улууһун баһылыга М. Соров, Ытык Күөл Алампа аатынан орто оскуолатын үөрэнээччитэ Саша Полускин кыттыыны ыллылар. Өксөкүлээх олорбут олоҕун чинчийиигэ, үтүө аатын үйэтитиигэ бэйэлэрин кылааттарын киллэрбиттэрин иһин сиэннэрэ Людмила, Лариса Кулаковскайалар, Парасковья Сивцева-Максимова Ил Түмэн махтал суруктарын туттулар.
Ил Түмэн бэрэссэдээтэлэ А.Н. Жирков Парасковья Сивцева-Максимоваҕа Махтал сурук туттарар
— Эһэм туһунан мин тугу этиэхпиний, норуоттан ордон? — диэн санаатын эттэ суруйааччы сиэнэ Раиса Реасовна. — Аҕам, бэйэтэ сүрэх ыарыһах киһи, араас ыарахан сыллары туораабыта, аҕатын туһунан биирдэ да мөлтөхтүк саҥарбатаҕа. Куруук төрөөбүт норуотугар эрэнэрэ, «норуот барытын билэр» — диирэ. Ол эрэммит эрэлэ туолан Эһээбит сырдык аата үйэлэргэ тилиннэ, Космос куйаарыттан хоһооно иһилиннэ, пааматынньыга Дьоллоох Дьокуускай туонатыгар дьэндэйдэ, айымньыта араас омук тылынан тылбаастанна. Аҕам биэс оҕоттон соҕотох хаалан эһээбит Ытык аатыгар «Аҕам олоҕо» кинигэнэн өйдөбүнньүк туруорбута. Мантан ордук дьолу Сир киһитэ тугу баҕарыай, онон төрөөбүт норуоппутугар, кини салалтатыгар, тумус дьонугар муҥура суох махтанабыт.
Өксөкүлээх дьоро киэһэтин Тааттаттан төрүттээх ырыаһыттар, үҥкүүһүттэр эҕэрдэ кэнсиэртэрэ киэргэттэ.
