Английскайы дириҥэтэн үөрэтэбит

Кэккэ предметтэри дириҥэтэн үөрэтэр хайысхалаах Бэрдьигэстээх орто оскуолатыгар директор Анджелика Альбертовна Гаврильева көҕүлээһининэн английскай тылы үөрэтэргэ оҕо интэриэһин, кэпсэтэр дьоҕурун үрдэтэр сыаллаах атын омук устудьуоннарын кытта көрсүһүү сыллата ыытыллар.

Быйыл муус устар 21-22 күннэригэр Америка Калифорния штатыттан Коувер Мишель Рене, Хотугу Ирландияттан Джошуа Мор, Кытайтан Чен Минмин, Индонезияттан Фабрина кэлэннэр 2-10 кылаастарга уопсайа 13 уруогу ыыттылар.

Оскуолабыт 4 кылааһын оҕолоро (республикатааҕы, улуустааҕы араас күрэхтэр дипломаннара, лауреаттара) английскайдыы «Гадкий утенок» остуоруйаны аахтылар, бары хорунан ырыа толордулар, хоһооннору аахтылар, бырайыак оҥорон кэпсээтилэр. Төрөппүттэр эмиэ кэлэн көрөн астыннылар.

Ыалдьыттарбыт Эбэгэ куйуурга, пааркаҕа шашлыкка сырыттылар.
Бу тэрээһиҥҥэ барыта 300-стэн тахса оҕо хабылынна.