Бүгүн мин эйигин көрөммүн

Бүгүн мин эйигин көрөммүн
Имэним саҥаттан тилиннэ.
Эдэркээн саастааххын санааммын
Иэйиилээх тылларым тылынна.

Урукку эн эдэр мөссүөнүҥ
Харахпар бу илэ көһүннэ,
Эдэркээн эн кэрэ мичээриҥ
Сүрэхпин долгутан уматта.

Үтүмэн сыллары нөҥүөлээн
Эн кэрэ дьүһүнүҥ сүппэтэх,
Килбиктээх төгүрүк иэдэскэр
Кистэлэҥ мичээриҥ өспөтөх.

Кэрэҕин билигин даҕаны
Эдэркээн мөссүөнүҥ ааспатах,
Хараҕын уотунан оонньуура
Билигин даҕаны бүппэтэх.

Бүгүн мин эйиигин көрөммүн
Эдэркээн саастарым тилиннэ.
Үтүмэн сыллары нөҥүөлээн
Сүрэҕим саҥаттан мөҕүстэ.