Багдарыын Сүлбэ, быраһаай!
Аарыма Сүдү Тиит соһуччу кэхтэҥҥин
Оо ама, бу сиртэн арахсан бардыҥ дуу?
Дьыл- хонук этиҥнээх ардаҕын кэтэҥҥин
Балысхан олохпут буурҕата сиэтэ дуу?
Уу саха тылынан астына иэйэр дьон
Соһуйан-өмүрэн харааста сөҥнүбүт,
Өрүүтүн кэс тылгын ылынар бары дьон
Чуҥкунуур чуумпуга санньыйан турдубут.
Ийэ тыл, сүмэ тыл алгыһын ылынан
Астына, дуоһуйа сахалыы сайарыҥ,
Былыргы ол сахтан өбүгэ тылынан
Саҥаны, сонуну куруутун айарыҥ.
Ол ааспыт үйэттэн өтөҕү сөргүтэн,
Умнуллан уостубут алааһы арыйан
Удьуортан утумнуур ааттарын аттаттыҥ,
Хас алаас сэргэтин аймаҕын аҕынныҥ.
Ураанхай сахабыт суолларын батыһан,
Холорук ытыллар тыалыныын хатыһан,
Хараҥа балыыртан кырдьыгы ирдээтиҥ,
Сахабыт норуотун сырдыкка сирдээтиҥ.
Олорбут олоҕуҥ устатын тухары
Бу тыйыс дойдуну сураһа кэрийдиҥ,
Былыргы өбүгэ илдьитин, тыллары
Анааран, чинчийэн аатааҥҥын бэрийдиҥ.
Үйэлээх бэчээтиҥ өссө да уһуннук
Урааҥхай саханы үөрэтэ туруоҕа,
Олорбут олоҕуҥ бу сиргэ дьоһуннук
Үйэлэр устата ыллыгы ууруоҕа.
Сып- сырдык санаалаах ырайга көтөөр дуу,
Ол ыраах дойдуттан дойдугун көрөөр дуу
Сирдээҕи бу дьоннор атаара хаалыахпыт,
Багдарыын эн ааккын истиҥник саныахпыт.
Удьурҕай. Нам.
25.03.2017 с.
