Эбээбэр анаан

Дойдум чугас, дойдум ыраах.
Кыра сыырдаах, төгүрүк алаас.
Күннээх,ыйдаах халлааннаах.
Кыра күөллээх,салгына ып-ыраас.

Сэргэлэрдээх тэлгэһэлээх.
Ойоҕоһугар кыра ампаардаах.
Ортотугар киэҥ дьиэлээх.
Тэпсиллибит ыллык суоллаах.

Харахпар көстөр наар ол түгэн.
Эмээхсин турар сис туттан.
Уоллара иһэр ынах үүрэн.
Оҕонньор олорор быар куустан.

Истэҕин онно ахтыһыыны.
Алаадьы сыттаах кэпсэтиини.
Дорҕооннордоох хоһуйууну.
Кытаанах,күүстээх санааны.

Оо, көрбүт киһи түүлбэр иккистээн.
Саатар саһан туран кистээн.
Аттыгар хаамсыам көстүбэккэ.
Илиигин имэрийиэм биллэрбэккэ.

Билэбин, тохтуу биэриэҥ соһуйан.
Аттыгар мин турарбын сэрэйэн.
Өрө тыынан ылыахпыт сэрэнэн.
Биир салгыны тэҥҥэ эҕирийэн…