Герой Попов аатынан совхоз тэриллибитэ 50 сыла

Кулун тутар 24 күнүгэр Мэҥэ Хаҥалас улууһугар Төхтүр сэлиэнньэтигэр Герой Попов аатынан совхоз тэриллибитэ 50 сылыгар аналлаах ветераннар кэнсиэртэрэ буолла. Урукку Герой Попов совхоз: хорообуттар, сыымахтар, бэдьимэлэр, төхтүрдэр, суолалар ааспыт кэми, норуоттар доҕордоһууларын көрдөрөр композицияны, агитбригада быһыытынан туруордулар, ону таһынан уус-уран ааҕыыга, биирдиилээн ырыаҕа, үҥкүүгэ, сценкаҕа күрэхтэстилэр. Биһирэммит нүөмэрдэр дипломант, лауреат аатын сүктүлэр.

Роман Романов «Эн — комсомол», Полина Захарова «Кырдьыбат вальс» ырыалара, кыргыттар ансамблларын толоруутугар «Доҕорбор», үҥкүү бөлөҕүн толоруутугар «Чороонноох үҥкүү», Надежда Андросова «Иитиллэр ийэ айылҕабар» анабыл, уус-уран ааҕыыта — лауреат, оттон «Норуоттар доҕордоһуулара» композиция дипломант аатын сүктүлэр.

Отделениелар былыргы олохторун сырдатан сценарий оҥоһуллубута кэрэхсэбиллээх. Сценаристар: Акулина Семенова, НадеждаАндросова. Сүрүн тэрээһини бэлэмнээтэ ветераннар сэбиэттэрин бэрэссэдээтэлэ Аграфена Васильева.