Иитээччилэр семинардара

Муус устар 14 күнүгэр Мэҥэ Хаҥалас улууһун академик Афанасий Чугунов аатынан Мэлдьэхси орто оскуолатыгар улуус оскуолаларын интэринээттэрин үлэһиттэрэ, соцпедагогтара кыттыылаах семинар ыытылынна. Бу тэрээһин олохтоох оскуола интэринээтин үлэтин уопутугар олоҕурда.

Семинарга улуус 12 интэринээтиттэн 27 үлэһит кыттыыны ылла, Марианна Билюкина (улуустааҕы үөрэх управлениетын иитэр үлэҕэ солбуйааччы), Татьяна Артемьева («Кэскил» улуустааҕы соцпедагогтар салайааччылара) салайан ыыттылар. Тыыллыма, Бүтэйдээх, Лицей, Төхтүр, Хорообут, Мэлдьэхси интэринээттэрэ оҕо иитиитигэр санааларын үллэстэн, бэйэлэрин программаларын билиһиннэрдилэр, үлэлиир бырайыактарын көмүскээтилэр.

Олохтоох Мэлдьэхси интэринээтин үлэтин-хамнаһын, дьиэтин-уотун Надежда Андросова сырдатта. Базатын көрөн, оҕону сахалыы тыыҥҥа иитэллэрин билэн, ыытар үлэлэрин кэрэхсээн бардылар.

Бу 2017 сылга номнуо иккис түмсүү. Иитээччилэр инники үлэлэригэр сүбэ ылан, санаа үллэстэн тарҕастылар.