Көҥүлгэ көччүйүүй

Эриэккэс иһирэх иэйиилээх,
Номоҕон нап -нарын илгэлээх,
Кэрэни тэлгэтэр эйгэлээх
Тупсаҕай ырыаны иһиттим.

Дуорайар бу дьоллоох олоххо
Сибэкки уу-нуурал ырыата.
Суккуллар хомоҕой хоһооҥҥо
Сып-сырдык ыралаах ымыыта.

Чээлэй күөх симэҕи хомуйан,
Уунуоҕум доҕорбор налыйан.
Абылаҥ ырыаттан дуоһуйан,
Иһиллии туруоҕум таалалаан.

Үөрүүй дуу, ырыаһыт чыычааҕым,
Күөрэйэр долгуҥҥа уйдаран,
Көтүүй дуу, далбарый аналым
Көҥүлгэ көччүйүүй астынан.