Кыра дуобатчыт улахан ситиһиилэрэ
Ааспыт сыл бүтүүтүгэр Чурапчы улууһугар Д.П.Коркин аатынан Чурапчытааҕы олимпийскай эрэллэр республикатааҕы интернат-оскуолатыгар «Эдэр талааннар» диэн дуобакка республикатааҕы күрэхтэһии буолан ааспыта. Барыта 9 улуустан, Дьокуускай куораттан, Хатастан 211 оҕо кыттыбыта.
Дьокуускай куорат 17 №-дээх оскуолатын 1 «г» кылааһын үөрэнээччитэ Петя Кычкин 2009-2010 сыллаах уолаттарга нуучча дуобатыгар 49 оҕоттон үһүс миэстэ, онтон сүүс харахтаах дуобакка 31 оҕоттон бастакы миэстэ буолла. Петя Дьокуускай куорат 5 №-дээх ДЮСШ-атыгар дьарыктанар, кинини дуобакка бэйэтин тапталлаах эбээтэ, Саха сирин уонна Россия үтүөлээх тренерэ Мария Никитична Бырдыннырова уонна төрөппүт аҕата Василий Николаевич Кычкин уһуйаллар, үөрэтэллэр.