Үлэни оонньууну тэҥҥэ

Ыам ыйын 14 күнүгэр академик Афанасий Чугунов аатынан Мэлдьэхси орто оскуолатын интэринээтин иитиллээччилэрэ сахалыы сиэринэн Аал уоту аһатан, Эбэни арыылаах алаадьынан маанылаан, ону сэргэ тапталлаах Суола үрэхпит үрдүгэр хаалбыт бөҕү-сыыһы ыраастаан, дойдуларын тупсаран кэллилэр.

Оҕолор айылҕаҕа тахсан үлэлээбиттэрин таһынан, лапта, «хортуоппуй» оонньоотулар. Сүүрүүгэ Саргылаан Санников бастаата. Улахан уолаттар «үс төгүл үс» ыстаныыга биирдиилээн күрэхтэстилэр, бу күрэххэ оскуола выпускнига Роберт Гаврильев тэҥнээҕин булбата. Маны таһынан сальто түһэн, гимнастическэй хамсаныылары оҥорон, бэйэлэрин сатабылларын көрдөрдүлэр, дуоһуйа айылҕаҕа сынньанан, сибиэһэй салгынынан сайа тыынан тарҕастылар.

Эбии аах:

Бэлиэтээһиннэр

Ваш адрес email не будет опубликован.