Литературнай музейга — «Сүрэх ырыата»
Муус устар 26 күнүгэр П.А. Ойуунускай аатынан литературнай музейга Сэмэн Данилов 100 сааһыгар аналлаах «Сүрэх ырыата» диэн олус истиҥ иһирэх киэһэ буолан ааста.
Киэһэ ыҥырыылаах ыалдьыта Варвара Семеновна Данилова- поэт кыыһа. СР народнай суруйааччыта Николай Лугинов бэйэтин ахтыытыгар Сэмэн Данилов саха айымньыларын нууччалыы тылбаастатан аан дойду таһымыгар таһаарбыт бастакы киһи буоларын тоһоҕолоон, «Сэмэн Данилов үлэтэ биир көнө суолунан барбыта. Владимир Державины өр сылларга эккирэтэн «Ньургун Боотур» олоҥхону тылбаастаппыта. Бу тылбааһы үрдүктүк сыаналыыбын. Сэмэн Данилов маннык сүҥкэн үлэтин улахан болҕомтону ууран туран бэлиэтии туруохтаахпыт,»- диэн эттэ.
ССРС үтүөлээх артыыската Анегина Ильинаҕа народнай поэт анабыл хоһоонноох, оттон Анегина Ильина Сэмэн Данилов тылларыгар хас да ырыалаах.
Норуот сөбүлүүр ырыаһыта Аркадий Михайлович Алексеев ытыктыыр, үтүө-маны дьонум этилэр диэн саҕалаата. Кини Сэмэн Даниловка барыта сэттэ ырыалаах эбит. Саха ырыатыгар бэлиэ буолбут «Саха үҥкүүтүн» үс ый мускуйбут. Хос ырыатыттан саҕалаан мелодия суруйбут.
Нуоҕай лабаа илиилэр
Дьол ырыатын куустулар
Үөрэ сөхпүт санаабар
Алаас тыала ИЛ гынар…- бу куплекка бастакы варианынан «алаас тыала аҥыс гынар» диэн эбит. Ону Аркадий Михайлович анаан ыллаан иһитиннэрэн, сөбүлэһиннэрэн, уларыттарбыт.
Сэмэн Петрович туһунан В.Н. Егоров-Тумарча, В.Е. Васильев-Харысхал, А.Е. Шапошникова бэйэлэрин ахтыыларын оҥордулар. Дедюкиннар, Хатылаевтар , Саргылана Бугулова, Илья Николаев бэйэлэрин ырыаларынан киэргэттилэр.
Дьокуускай куорат 12 нүөмэрдээх оскуолатын үөрэнээччитэ Сандаара Семенова ис- иһиттэн арыллан «Үөрүү», «Мин ыллыахпын баҕарабын» хоһооннору ааҕан барыбытын долгутта. Кадетскай оскуолаттан Петя Куличкин, Коля Трегубов, 26 нүөмэрдээх оскуолаттан Сергей Павлов, Андриан Антонов доргуччу хоһоонноруттан ааҕан, Ян Попов хомуска оонньоон киэһэни эбии киэргэттилэр.
Бу тэрээһини Н.Е. Винокуров-Урсун тэрийэн, иилээн- саҕалаан ыытта. Маннык үтүө, сылаас тыыннаах киэһэни бэлэхтээбиттэригэр көрөөччүлэр ааттарыттан музей үлэһиттэригэр барҕа махталбын тиэрдэбин.
