Мэҥэ Хаҥалас — Алдан улуустарын доҕордоһуута

Мэҥэ Хаҥалас — Алдан улуустарын доҕордоһуута тэриллибитэ аны кыһын лоп курдук үйэ аҥара буолар. Бу Сэбиэскэй кэмҥэ «тыа сирин олохтооҕо уонна промышленность үлэһитэ биир сомоҕолор» политиканан үөскээбит араас омуктар икки ардыларыгар хардарыта өйөһүү, билсии, культураны хаҥытыһыы, көрдөрүү билигин да салҕанан барар. Быйыл эмиэ мэҥэлэр Алдаҥҥа кыһыны атаара тиийдилэр, алданнар аны сайын Мэҥэҕэ сахалыы ыһыах ыһа, сайыны уруйдуу кэлиэхтэрэ.

Мэҥэ Хаҥалас улууһун баһылыгын солбуйааччы П.Д.Сазонов салайааччылаах икки Уйбаан Аргуновтар (биирэ культура үлэһитэ, биирэ тыа хаһаайыстыбатын управлениетын начальнига), 39 сыл ыанньыксыттаабыт, » Сиэрпэ уонна Өтүйэ» күрэх лауреата, Анатолий Кривогорницын бирииһин лауреата, «Пятилетка эдэр гвардееһа» аат үс төгүллээх хаһаайына Михаил Егоров (Хорообут) буолан кэллибит. Маны сэргэ Төҥүлүтээҕи «Хоту» ТХПК бэйэ оҥорон таһаарар үрүҥ ас арааһын атыылыыр. Алдан улууһун дьоно — сэргэтэ алаас аһын хамаҕатык атыылаһаллар. Киэһэ культура дьиэтигэр бырааһынньыктааҕы концерт буолара былааннанар.

Алданнар ыалдьыттарын аатырбыт хайыһар базатыгар түһэрдилэр.