Мэҥэ сирин талааннара
Кулун тутар 10 күнүгэр П.А. Ойуунускай аатынан Саха театрыгар Мэҥэ Хаҥалас уус-уран көрүүтүн кыайыылаахтарын концера үрдүк таһымҥа ааста. Сыллата ыытыллар уус-уран көрүү уонна спорт эстафетатын лауреаттара Майа сэлиэнньэтэ 110 сылынан, саҥа Театр дыбарыаһа тутулларыгар бэйэлэрин дьоһун кылааттарын киллэрдилэр. Саала иһэ толору мустубут көрөөччү ытыс тыаһынан хабыллан олордо. Сонун көстүүлээх ансамбллар, үҥкүү бөлөхтөрө, чабырҕахсыттар, ырыаһыттар Раиса Сергучева, Сардаана Осипова, Майатааҕы музыкальнай оскуола оркестра, Майатааҕы народнай хор – концеры дойдубут тыынынан толордулар. Мэҥэ сирэ дьоҕурдаах, сырдыкка, кэрэҕэ дьулуурдаах дьонунан толорутугар өссө төгүл көрөөччүлэрин итэҕэттилэр.
