Мэлдьэхси оскуолатын 110 сыла

Мэҥэ Хаҥаласка Мэлдьэхси нэһилиэгин оскуолата 1907 с. «Күөх Оттоох»  диэн сиргэ аһыллан үлэтин саҕалаабыта. Онно бастакы учууталынан учуонай, биллиилээх историк Гаврил Васильевич Ксенофонтов үлэлээбитэ.

Бу күннэргэ академик Афанасий Чугунов аатынан Мэлдьэхси нэһилиэгин оскуолата 110 сааһын көрсө араас тэрээһин ыытыллар. Оскуола 1996 сылтан орто, 2004 сылтан агрохайысхалаах оскуола быһыытынан үлэлии турар.

Тэрээһиннэр чэрчилэринэн нэһилиэк олохтоохторо Майаҕа киирэн акция кэнсиэри бэлэмнээн көрдөрөн 22450 солкуобайы киллэрдилэр. Кэнсиэргэ оскуола выпускниктара кэргэннии Лидия, Иннокентий Шариннар үҥкүүлэринэн, Екатерина, Иннокентий Птицыннар ырыаларынан, Любовь Платонова чабырҕаҕынан, ыаллыы олорор Догдоҥо нэһилиэгэ көрдөөх сценкаларынан кытыннылар.

Үөрэх үлэһиттэрин профсоюһун бэрэссэдээтэлэ Степан Андреев оскуола коллективыгар телевизор, оҕолор саахымакка дьарыктаналларыгар анаан саахымат набордарын бэлэхтээбитэ кэрэхсэбиллээх.

Быйылгы үөрэх дьылыгар оскуола коллектива 65 үлэһиттээх, директорынан Лариса Дмитриевна Сыромятникова үлэлиир. Оскуолаҕа  араас көлүөнэ үөрэнээччилэр көрсүһүүлэрэ  ыытылла турар.