Үүммүт күҥҥэ

Үтүө күнүм кылайда
Үүннэ саҕах тыҥ кыла
Үрүҥ биитэ кылбайда
Үөрэ түстэ кытыла.
Хара түүнүм саппаҕын
Халбарыччы хаһыйда,
Хаарыан хаарыс хаппаҕын
Хастыы тардан арыйда.
Ибир тырым күлэ-сала
Илин баһы сыллаан ылла
Иилэр сирин иэнин тала
Иэнигийдэ өссө тылла.
Эгэй дьирим эҥил баһа
Эгэлдьийдэ көп эҥээрэ
Эгди буолан күлүм таһа
Элэстэннэ көй тэлээрэ.
Талыы далбар тахсар күнүм
Таһаатынан сыҕарыйда
Талба кыыма уоттаах күлүм
Талбаарыйа аралыйда.
Ойор күнүм эгэ-дьаҕа
Олуктанна суолун тыыра
Ойуолаата төлөн саҕа
Олохсуйда сырдык ыыра.
Көмүс иилээх көлөөскөтө
Көтүөккэлээн сонно-тута
Көрүлээтэ көҥүл көтө
Көөчүктэннэ өҥүн тута.
Толуу халлаан оройугар
Толбон тиһэн саатаата
Тоҥуй тыыннаах дьулайыгар
Торҕо оһуор хатаата.
Аллар уоттаах дьэс күнүм
Аҕыар суһум аргыстанна
Аанын аста бүгүнүм
Аарыыр кэмэ алгыстанна!

Эбии аах: