Ньурбаҕа Варвара Потапова төрөөбүт күнүн бэлиэтээтилэр
Ыам ыйын 13 күнэ — саха бастакы бэйиэт дьахтара Варвара Потапова төрөөбүт күнэ. Ньурба улууһун култууратын дьаһалтатын үлэһиттэрэ, «Ньурба уоттара» айар түмсүү чилиэннэрэ, поэзияны сэҥээрээччилэр бэйиэт музей-уһаайбатыгар төрөөбүт күнүн бэлиэтээтибит.
Бу күн Варвара хоһооннорун сэргэ биирдиилээн дьон бэйэлэрэ айбыт хоһооннорун наһаа истиҥник аахтылар, санаа үллэһиннилэр, ыраах Убайаан олохтоохторо Варяны сылаас тылынан ахтан-санаан аастылар.
Убайаан түөлбэ салайааччыта Анна Шадрина, Александра Дмитриева, суруналыыс Римма Угапьева,ыраах Булуҥ оройуонуттан ыалдьыттыы кэлбит Лидия Тогуллахова уо.д.а. санаа атастастылар, кыыспытын истиҥник аҕыннылар.
Хоһоон ааҕыытыгар ордук Хаарчаана Угапьева бэйиэт хоһоонун уутугар-хаарыгар киирэн, арыт өрө күүрүүлээхтик, арыт куолаһын намтатан уйадыйа аахпыта айымньы ис хоһоонун өссө дириҥэттэ. Салгыы Ньурбатааҕы көһө сылдьар драматическай театртан СР норуодунай артыыската Валентина Николаева сүрүн оруолга оонньообут спектаклыгар сырыттыбыт, кини 75 сааһын туолбутун чиэстээхтик бэлиэтээтилэр.
Бэлиэ күн наһаа үчүгэй өйдөбүлү иҥэрдэ. Тэрээһиннэргэ сылдьан көрөөччүлэр олус астынан, истиҥник махтанан тарҕастыбыт.
Саха дьоно Варвара Потапова айымньыларын өйдүүр, сыаналыыр: «Саха бастакы поэтессата Варвара Потапова курус санааҕа куустаран олорон эппитэ: «Дьонноор, миигин таптааҥ!» Кини ыарахан дьылҕалааҕа, уустук поэзиялааҕа. Ол өйдөнөр. Ураты чараас дууһалаах киһи барытын сүрэҕин ыарыытынан ырыҥалыыра. Ол да иһин эппитэ: «Мин сибэкки буолбатахпын… Тымныы халлааны таламмын, ойдом үүммүт хахыйахпын…» Тыал-куус, тымныы халлаан анныгар соҕотох куоҕаҥныы, иэҕэҥннии, иэйэ тураахтыыра… Ол кини Саха дьонун дьолун иннигэр толук буоларын билэрэ: «Мин да толук буолуом дьол ситэрин туһугар…» Ол да буоллар эдэркээн кыыс дьолго дьулуһара, «сылааһы таптыыр дууһалааҕа», «үрүҥ өҥү өрүү көрдүүрэ» уонна «өҥө суох бороҥ таһаабар күөххэ тапталы дьон көрүөҕэ» диэн эрэнэрэ. Дьонноор, таптааҥ кинини, санааҥ, махтаныҥ, иэйин! Бүгүн Варвара Потапова төрөөбут күнэ!!!» — диэн ватсабынан бу күн суруйуулар тарҕаннылар.
Варвара Потапова.
Мин сибэкки буолбатахпын.
Суох, мин арыый атыммын —
Тымныы халлааны таламмын,
Ойдом үүммүт хахыйахпын.
Буурҕа улуйар түүнүгэр
Мин өрүү соҕотох буолабын,
Кырыалаах лабаабын уунабын —
Айылҕа уордайбыт күүһүгэр.
Мин сибэкки буолбатахпын.
Ол эрэн, оһуор от кэриэтэ,
Сырдык тыыннааҕым бэлиэтэ —
Сылааһы таптыыр дууһалаахпын.
Ол иһин, күүтэбин: хаһан эрэ
Мин хатан эрэр лабаабар,
Өҥө суох бороҥ таһаабар
Күөххэ тапталы дьон көрүөхтэрэ.
Баҕар, үөһэ тыынан ылыахтара —
Ыйдаҥа тунал түүннэригэр,
Ырааҕы ахтар түүллэригэр,
Уонна мин туспунан ыллыахтара!..
* * *
«Көрбөккүөт»
Мин бэйэм – күһүҥҥү айылҕабын…
Көрбөккүөт –
Бу тохтор хатыҥ араҕас сэбирдэхтэрэ,
Мин санааларым буоланнар,
Сиргэ таммалыы ыһыллаллар.
Истибэккиэт, –
Ол ааһар үөр хаас саҥатыгар
Мин ыраахха, айаҥҥа угуйар ыҥырыым
Толоон үрдүнэн кылыһахтыырын.
Таайбаккыат, –
Күөх сайыҥҥа тапталбын этээри
Махтал хараҕын уутунан ардыырбын….
Ити мин –
Эһиилги өҥ сайы алгыыбын.