Оо, ньургуһун…

Саҕахтан күн көрөн күндээрэн
Таласта халлааҥҥа күөрэйэ,
Ньургуһун тахсарын кэтэһэн
Көрдөөтүм кырдалы кэрийэ.

Санаабар тоҥ буору тобулан
Эрдэлээн тахсыаҕын баҕардым,
Кыыс кэрэ намчытын хоһуйан
Бу баардыы астына ыллардым.

Дьиримнээн күн уотун толбоно
Хонууга ойуолуу оонньоото,
Сир халлаан силбэһэ холбоно
Орто сир угутун оймоото.

Ол кэмҥэ иннибэр ньургуһун
Көрсүбүт үөрүүттэн тылынна,
Кыс хаары уулларан, оо уһун
Күүтүүлээх сырдыгы ылынна.

Тобуктаан, сэрэнэн санаабар
Ытыспын уунаммын өйөөтүм,
Ааспыты санатан тулабар
Күн эмиэ үөрэрин өйдөөтүм.

Былырыын кэрэчээн ньургуһун
Бу манна көһүтэн турбутуҥ,
Ол кэми билигин олуһун
Эргитэн бу баардыы көрөбүн.

Сыл аайы бу маннык эргиллэн
Кырдалы киэргэтэн, эн үүнээр,
Эдэрдии ол кэмҥэ тиргиллэн
Кэлэрбэр ньургуһун көрсүһээр.