Өрөспүүбүлүкэ күнүнэн

Аргыардаах, чысхааннаах бу тыйыс дойдуга
Өрөгөй ырыата ыраахтан дуорайар,
Айыллан үөскээбит олоҥхо тойуга
Былыргы үйэттэн эҥсиллэн иһиллэр.

Урааҥхай сахалар аатырар кэмнэртэн
Түөлбэлээн олорон тэнийэ тэлбиппит,
Хороҕор муостаахтан, сыспайдыыр сиэллээхтэн
Үйэлэр тухары иитиллэн кэлбиппит.

Быралгы дьыллартан, өбүгэ саҕаттан
Хас үйэ аайытын сирдьиттэр бааллара,
Өҥүрүк куйаастан, тоһуттар тымныыттан
Харысхал, көмүскэл буоланнар таһаара.

Холорук ытыллар Өктөөптөн саҕалаан
Улуукан дьоннорбут туруммут кэмнэрэ,
Дьылҕабыт ыйааҕын хорсуннук туруорсан
Барыбыт туһугар олохтон баартара.

Усталаах туората букатын көстүбэт
Сойууспут сиригэр олорон испиппит
Ыһыллыы кэмигэр дьылҕабыт биллибэт
Буккуурдаах сылларын
этэҥҥэ ааспыппыт.

Бастакы сирдьиппит ыллыктаах этиитэ
Эрэли үөскэтэр сырдыкка тэҥнээҕэ,
Дойдубут дьылҕатын норуокка тиэрдиитэ
Бодону көрүнэн тардынар кэмнээҕэ.

Бу туспа үйэҕэ сиэттиһэн кэллибит
Дьон буолар ыйаахпыт ааттанар кэмигэр,
Дойдубут бэлиэтин бүгүн күн көрсөбүт
Этэҥҥэ бары да олорор туһугар.

Үөрүөҕүҥ- көтүөҕүҥ ааппытын ааттатан
Сахабыт сиригэр дьоллоохтук олоруох!
Аар саарга ааттанар сахалар аатыран
Уйгулаах чорооммут быйаҥын толоруох!