Үс тыл
Күнүскү түбүктэн сылайан
Киэһэ күммүт наҕылыйда,
Алтан сардаҥа ыһыллан
Арҕаа тыаттан намылыйда…
Сылаас үүт сытынан
Салгын тула дыргыйда,
Ыраас күн ырыатынан
Ыраах кырдал кылыйда…
Көҥүл көтөр тыалга
Ким кистэлэҥи сипсийдэ,
Баара-суоҕа үс тылга
Бу турар тулам эргийдэ…
Эрдэһит саас түбүгүрэн
Эниэ быарын киэргэттэ,
Ааспат иэйии түүллэринэн
Ааһар кэми өрүкүттэ.
