Саҥа кинигэ үөрүүтэ
Муус устар 20 күнүгэр Майаҕа, улуустааҕы киин библиотекаҕа «Мэҥэ Хаҥалас суруйааччылара, ааптардара» — диэн кинигэ презентацията буолан ааста. Бу 500 тирааһынан «Кытыл» издательствоҕа тахсыбыт кинигэни Моорук оскуолатын иһинэн үлэлиир литературнай музей сэбиэдиссэйэ Аполлон Михайлович Апросимов, Майа киин библиотекатын библиограба Надежда Михайловна Винокурова хомуйан, «Эркээйи» хаһыат үлэһитэ Марфа Птицына редактордаан оҥордулар.
Кинигэ бастакы түһүмэҕэр Мэҥэ Хаҥалас улууһун Аҕа дойду сэриитин иннигэр айан суруйан ааспыт сүүрбэччэ ааптардара, Манчаарыттан Майаҕастыыраптан саҕалаан, фроҥҥа Ийэ дойдуларын көмүскэлигэр дьоруойдуу охтубут дьону хабан киллэрилиннэ. Иккис түһүмэххэ улуустан 35 киһи сырдатылынна. Оттон үһүс саамай улахан түһүмэххэ 85 кинигэлээх (эбэтэр кинигэлэрдээх) ааптар хабылынна. Бу түһүмэххэ сүрүн матырыйаалы нэһилиэк библиотекардара хомуйан, оҥорон таһааттардылар.
Кинигэ сүрүн уратытынан хас сырдатыллыбыт ааптар таһаартарбыт кинигэлэрин, кинилэр тустарынан суруллубут ыстатыйалар библиографиялара оҥоһуллубута буолар.
Үгүс суруйааччыларга, ааптардарга литературоведтар, кириитиктэр эбэтэр суруйааччылар үлэлэриттэн бэрт бэргэн цитаталар бэриллибиттэрэ, кинилэртэн сорохторун псевдонимнара ыйыллыбыттара, хаартыскалара тахсыбыта кинигэни киэргэтэр.
Манна даҕатан сонуннаатахха былырыын «Айар куттар алтыһыылара» диэн «Таммахтар» литературнай холбоһук чилиэннэрин хомуурунньуга (А.С.Владимирова, М.И.Птицына), бу кинигэни сэргэ «Кистэлэҥ иэйиилэр» (М.Н.Габышева, И.В.Яковлева) диэн бу күҥҥэ айа-суруйа олорор, сүнньүнэн эдэр ааптардар айымньыларын хомуурунньуга нэһилиэктэринэн аттарыллан таһаарылынна.
Бу үтүмэн үлэ улууспут салалтата, култуура управлениета, киин библиотека туһааннаах хайысхаҕа өйөбүллээхтик сыһыаннаһалларын, сөптөөх болҕомто ууралларын ааҕааччы истиҥник ылынар. Ааҕааччылар бэйэлэрин санааларын «буруолуу сылдьар» кинигэҕэ этэллэригэр ордук бастакы «Айар тыл маҥнайгы хараҥаччылара» түһүмэххэ сырдатыллыбыт ааптардарга үйэлээх өйдөбүл буолбутун биһирии, түмүллүбүт үлэ эдэрдэри айар үлэҕэ көҕүлүөн, ыччаты иитиигэ туһалыан бэлиэтээтилэр.
Улуус баһылыга Н.П.Старостин Махтал суругун култуура управлениетын начальнига С.М.Холмогоров, үөрэх управлениетын начальнига И.В.Черкашина, ыччат уонна дьиэ кэргэн управлениетын начальнига К.А.Захаров эҕэрдэ суруктары туттардылар.
Презентацияҕа кыттан үөрүүнү үллэстибит дьон саҥа кинигэни хамаҕатык атыыластылар, онон ааҕар дьон билигин да элбэҕин көрдөрдүлэр.
А.М.Апросимов
