Саас
Тугу этиэн быһаарбакка
Туран хаалла ааммар саас.
Быйыл маннык сэрэппэккэ
Кэлбититтэн саатта саас.
Хайыай, хаары ириэрдэ,
Сыарҕа суолун алдьатта,
Буруй үөһэ буруй дэттэ —
Сыалаах хаһаас сыттанна.
Былыттартан инчэҕэйдии
Хаарын тэбии сатаата,
Халандаарга атын ыйдыын
Балыйсыаҕын баҕарда.
Саҕынньаҕы устубакка
Сааһы биирдэ көрсүбүт
Саха дьоно соһуйбучча
Саамылаһа хаамтыбыт.
Күн-дьыл маннык сэрэппэккэ
Эбэн иһэр эбээт, саас.
Уонна барар төннүбэккэ
Ханна эрэ эдэр саас…
Билбит киһи, хаһан эрдэ,
Хаһан хойут туох буолуон,
Саҕынньаҕы устар кэрэ
Сааһым халтай ааһымыан…