Сааскы хоһоон

Кус маныыр „Көлүччэм»—тэтэрээт.
Бэргэн саам—уһуктаах харандаас,
Санаабар, саһарҕа тэтэрээт
Боруорар. Кус көтөр. Хаас ааһар.

Кус—миэхэ сылбырҕа, сытыы тыл.
Оттон хаас—дэҥҥэ баар дьикти тыл.
Чуумпута маныаха дьэ олус.
Олордум. Уһуннук олордум.

Кустары ытыалыыр кэриэтэ
Тыллары хоһооҥҥо наардыыбын…
Хаас көтөр төрүт да мэлийдэ—
Көстүбэт дьикти тыл букатын.

Сааскы кус бултанар үөрүүтүн
Санааммын, син чэпчии дуоһуйдум.
Бултаатым кыракый чөркөйү—
Биир тэттик хоһоону суруйдум.

Биир хоһоон биир куска тэҥнэннин,
Поэма ааттааҕа хаас дэннин.
Поэттар сааһыттар буоллуннар,
Хааһы да, куһу да кыайдыннар.