Сахалыы википедияны ситэрии, толоруу

Ийэ тылбыт күнүгэр аналлаах *ҺӨҔҮҤ* тэрээһин быйыл кэҥээн биэрдэ, диэн биллэрэр сахалыы википедияны төрүттээччи, көҕүлээччи Николай Павлов – halan.

«Дьоҥҥо биллибит биир дойдулааҕыҥ, аймаҕыҥ туһунан интэриниэт-энциклопедияҕа ыстатыйа баар буолуон баҕарар буоллаххына, кини туһунан хаһыакка суруллубуту, ахтыы кинигэтин аҕалаар. Ол суруллубукка олоҕуран устудьуоннар Бикипиэдьийэҕэ ыстатыйа омоонун саҕалыахтара. Көрдөрөн туран. Уонна салгыы хайдах суруйары, тупсарары көрдөрөн биэриэхтэрэ. Бу киһи тугунан эрэ биллибит буолуохтаах: мэтээллээх, уордьаннаах, сыбаанньалаах, эбэтэр нэһилиэккэ, улууска, куоракка тугу эрэ тэрийбит салайааччы, ситиһиилээх үлэһит, спортсмен. Ону таһынан Бикипиэдьийэҕэ тэрилтэ туһунан суруйуохха сөп: нэһилиэккэ баар буола сылдьыбыт холкуос, сопхуос, үлэлии турар бөдөҥ тэрилтэ, оскуола… Эбэтэр сир, үрэх, аатырар алаас, күөл, хайа эҥин туһунан суруйуохха сөп.

Кытаатан кэлэн үөрэнэн хаалыҥ!» – диэн ыҥырар Николай Павлов.
Уонна, үгэс быhыытынан, төрөөбүт тыл күнүнэн бэлэх – i-phone-ҥа, i-pad-ка сахалыы клавиатура аттарыытын босхо туруортарыаххын сөп.

Онон олунньу 13 күнүгэр, бэнидиэнньиккэ, Өксөкүлээх Киинигэр 17 чаастан (мунньаҕа, кэнсиэрэ 18 чаастан),
Опера уонна балет тыйаатырыгар 17 чаастан (мунньаҕа уонна кэнсиэрэ 18 чаастан) «КиберСаха» хамсааһын ыччаттара эhигини күүтэллэр.