Сунтаарга «Халадаай күрэҕэ»

Бүгүн, кулун тутар 12 күнүгэр, Сунтаарга «Сунтаар ситимэ» (салайааччы А.С. Кириллина, научнай сал. и.н.к. С.И. Петрова тэрийиитинэн «Халадаай» ырбаахы күрэҕэ буолла. Бу күрэххэ Сунтаартан, Кириэстээхтэн, Кутанаттан, Тойбохойтон көмүс тарбахтаах иистэнньэҥнэр күрэс былдьастылар.

Киэһэ түмүккэ араас быһыылаах сахалыы халадаай ырбаахылары, кыбытык тигииннэн тигиллибит эдэр ыччаттарга аналлаах уонна деловой сэлиэттэри көрдөрбүттэрэ дьон болҕомтотун тарта. Эдэр модельердар, иистэнньэҥнэр тахсан эрэллэрэ киһини үөрдэр. Сунтаар Далбар Хотуттарын дьэрэкээн симэхтээх, оһуордаах таҥастарын уонна сүктэр кыыһы таҥыннарыы сиэрин-туомун «Сунтаар ситимнэрэ» көрдөрбүттэрэ киһини эрэ сэргэхситэр. Сарсыарда өттүгэр тигии кистэлэҥнэригэр маастар кылаас ыыттылар. Онно элбэх кэрэ аҥардар сылдьан үөрэннилэр.

Кэнники кэмҥэ сахалыы төрүт таҥаспытын интэриэһиргиир уонна тигэр дьон элбээбитэ киһи хараҕар быраҕыллар. Күнүс Сунтаарга сахалыы таҥастаах уулуссаҕа хаамыы буолла. Тэрээһин элбэх спонсордар көмөлөрүнэн бэрт сэргэхтик барбыта бэлиэтэннэ. Ол курдук улуус дьаһалтата Гран-при быhыытынан иистэнэр массыына туруорда, онтон да атын сыаналаах бириистэр оонньоннулар.