«Сыккыс» түмсүүнү кытта көрсүһүү

Муус устар 22 күнүгэр «Офсет» кинигэ кыһата Горнай улууһугар тахсан, «Сыккыс» литературнай түмсүүнү кытта көрүстүбүт.

Ол сиэринэн олохтоох «Дабаан» радиостудияҕа Ангелина Захарова — Уһуйаана иитэр-үөрэтэр оҕолоро хоһоон аахпыттарын иһиттибит. Кырачаан барахсаттар куоластарын истэн бары даҕаны ууллан хааллыбыт. Салгыы «Офсеттан» Дария Николаевна, Алексей Максимович Скобелевтар үрдүк көтөҕүллүүлээхтик интервью биэрдилэр.

Сэмэн уонна Софрон Даниловтар ааттарынан музейга хас биирдии экспонаты Кээтии Александрова олус сиһилии кэпсээн үөртэ. Күн иккис аҥарыгар Мытаахха таҕыстыбыт. Манна ини-бии Даниловтар музейдарыгар Артур Егоров батыһыннартаан, олус тиийимтиэтик сиһилии кэпсээн умсугутта.

Аҕалбыт кинигэлэрбит быыстапкатын сирийэ көрдүлэр, Сэмэн Данилов хоһоонноруттан иһиттибит, викторинаҕа кытынныбыт. Олохтоох автордар Руслан Платонов, Айталыына бэйэлэрин кинигэлэрин бэлэх ууннулар. Хардатын Скобелевтар Сыккыстарга — айар, суруйар дьоҥҥо — » Офсетка» кинигэ таһаартаралларыгар 5000 солкуобайдаах сертификат туттардылар.

Түмүкпэр, истиҥ көрсүһүүнү бэлэхтээбит «Сыккыс» түмсүүгэ: Айылҕаанаҕа, Уһуйаанаҕа, Айталыынаҕа, Артур Николаевичка улахан махталбытын тиэрдэбит.