Тапталы туойуоҕум…
Ыам ыйын 6 күнүгэр дьоллоох Дьокуускай куораппытыгар «Айар Кут» түмсүү талааннаах уола Сэргэй Сэмэнэп — Сэгэй бастакы «Тапталы туойуоҕум» диэн ааттаах кинигэтин сүрэхтэниитэ буолла. Аатын курдук Сэгэй хас биирдии хоһооно тапталы иҥэриммит. Бу кинигэтэ күн сирин көрөрүгэр көмөлөспүт киһитэ — Сэгэй ийэтин өттүнэн чугас аймаҕа, СӨ норуодунай суруйааччыта, СӨ култууратын үтүөлээх үлэһитэ, Саха сирин аҕыйах ахсааннаах норуоттарын Ассоциациятын президенэ, Россия суруйааччыларын союһун чилиэнэ Андрей Васильевич Кривошапкин. Бу кинигэҕэ Андрей Васильевич Сэгэй икки хоһоонун эбээннии тылбаастаабыта киирдэ. Андрей Васильевич быраатын, ааптары «өссө да айымньыларыҥ күн сирин көрөн истиннэр,» — диэн алҕаата.
СӨ култууратын туйгуна Константин Мохначевскай кэрэ алыптаах куолаһынан ыллаан мустубут дьону олус сэргэхситтэ. «Айар Кут» түмсүү чилиэннэрэ тахсаммыт Сэгэйбит хоһоонунан литературнай монтаж аахтыбыт, ааптары долгуттубут. Михаил Михайлович Донской: «Айар дьоҕур айылҕаттан бэриллэр. Мин сибилигин хоһоон айар кыаҕым суох. Сэгэй хоһоонноро хайдах курдук кэрэлэрий,»- диэн туран олус кылыһахтаах куолаһынан ыллаан киирэн барда: «Эн биһиги кыракый сааспытын санатан»… Салгыы Россия суруйааччыларын союһун чилиэнэ Анатолий Старостин — Сиэн Кынат: «Ырыа тылын суруйар ырыанньык бэйиэт буолуон сөп»- диэн түмүктээтэ.
Амма улууһун Абаҕа нэһилиэгин Бочуоттаах олохтооҕо Галина Захарова — Уордьаннаах кыыһа Сэгэй «Сэгэртэйим» хоһоонугар норуот матыыбынан ыллаан иһитиннэрдэ.
Сэгэй хоһоон суруйарын таһынан мелодия эмиэ айар. Балта Айыллаана түөрт саастааҕар Степан Дадаскинов тылларыгар Сэгэй матыыбыгар «Кулунчук ийэлээх» ырыанан Сунтаар улууһугар ырыа күрэҕэр кыттыбыт. Айыллаана Семенова быйыл «Этигэн хомус» уонна «Саҥа ырыа» интерактивнай күрэхтэр кыайыылаахтара. Ырыаҕа сирдээн киллэрбит убайыгар «Үрдүккэ» (М. Семенов, Г. Павлов) ырыаны анаата.
Бииргэ үөрэммит доҕотторун аатыттан Полина Яковлева ахтарынан, кинилэр Сэгэй хоһоон суруйарын билбэттэрэ, арай оскуолаҕа ыытыллар концертарга ыллыыр эбит. Онон үөлээннэхтэринэн киэн тутталларын уонна инники үлэтигэр ситиһиини баҕаралларын эттэ.
Сэмэнэптэр бары айар куттаах, ырыа тыыннаах дьон: Маргарита, Мэхээс, Харитон ыллыыллар, Матрена үҥкүүһүт. Балта Маргарита Индеева: «Аҕабыт айар куттаах этэ. Сэгэй ырыаларын олус сэргиибин. Кини айбыт ырыалара киэҥ эйгэҕэ тарҕаныахтарын баҕарабын» диэн туран «Дойду ахтылҕана» ырыаны бэлэхтээтэ.
Салгыы доҕотторо Владимир Жирков, Константин Дмитриев, Валерий Никифоров — Суор Уола, Аскалон Егоров этэн-тыынан, ыллаан-туойан киэһэни киэргэттилэр.
Сэгэй бастакы кинигэтин сүрэхтэниитин иилээн-саҕалаан тэрийэн ыыппыт кийиитигэр Евдокия Семеноваҕа махтанан уонна алгыһыгар кыттыһан туран, Сэгэйгэ ис кутуҥ иэйиилэрин иилэ хабан ылаҥҥын, сааһылаан түмэҥҥин саҥа айымньыларыҥ кинигэлэрэ күн сирин көрө турдуннар диэн алгыыбын.
