Уһуктуу

Сир дойду сүрэҕэ тэбиэлээн,
Силистэн силискэ тардыста,
Хам ылбыт кыаһааны ууллара,
Хаар уутун үрэххэ түһэрдэ.

Илдьити истибит күн уота,
Илин им хараҕын арыйда,
Суһаллык солуну иилиммит,
Туллугум кыната тыаһаата.

Кэлэр кэм кэрэ туоһута,
Ньургуһун төбөтө ньуолаҕын тэбэннэ,
Үрдүк сир сылаас иэниттэн,
Бастакы сибэкки күлүүтэ тэнийдэ.

Сир ийэ көстүбэт илиитэ,
Саҕахтан саҕахха курдары тайанна,
Инчэйбит астарын өрүтэ тараанан,
Ибир тыал куурдарын кэтэстэ.

Уһуктуу бэлиэтин айылҕа чиҥэтэн,
Чуопчаарар чыычааҕын халлааҥҥа көччүттэ,
Хойуу тыа быыһынан ыксаллык,
Хомурах суорҕаны арыйа нэлэттэ.

Уһуктуу,
Уһуктуу,
Тулабар уһуктуу !
Тиллэр тыын убуруур,
Тилин диэн уруйдуур!