Ньургуһун
Ньуолах түүгэ сууланан
Харалдьыкка хатанан,
Сииги- хаары бүрүнэн
Тула өттүн көрүнэн,
Аргыый сэмээр өндөйөн
Көрөн турда өҥөйөн
Ньургуһунум сэрбэйэн.
Ньуку- ньуку ньургуһун,
Уйан сүрэх иэйиитэ
Ыраас таптал ырыата,
Устар олох үөрүүтэ
Дьикти кэрэ сибэккитэ.
Сиртэн- буортан тирэнэн,
Сэрэммиттии сэгэйэн
Сылаас тыалга бигэнэн,
Эминньэҕин тэрэтэн
Уйадыйа нуоҕайан
Күҥҥэ күүскэ тардыста
Күн утаҕар куустарда.
Ньуку- ньуку ньургуһун
Икки сүрэх тэбиитэ,
Таптал тыыннаах туоһута
Кэрэ кэммит тойуга
Дьоллоох олох симэҕэ.