«Дьиэ кэргэн дьолун күлүүһэ»

Ыам ыйын 19 күнүгэр «Россия Ийэлэрэ» Бүтүн Россиятааҕы общественнай хамсааһын, РФ «Билии обществотын» СС салаатын, СР ыччат уонна дьиэ кэргэн политикатын министерствотын уонна СР Правительствотын иһинэн үлэлиир ГТАС управлениетын бииргэ үлэлээһиннэринэн «Эдэр ыал оскуолатын» директора РФ Үөрэҕин министерствотын Бочуоттаах үлэһитэ, СР үөрэҕириитин үтүөлээх үлэһитэ, РФ «Россия Ийэлэрэ», «Билии общество» СС салаатын Президиумун чилиэнэ Маргарита Петрова тэрийиитинэн «Дьиэ кэргэн дьолун күлүүһэ» түмүктүүр тэрээһин ыытылынна.

Бу оскуола үһүс сылын үлэлиир. Сүрүн сыала-соруга – эдэр ыччаты инники олоххо бэлэмнээһин, туруктаах ыалы элбэтии. Ол туһуттан биирдиилээн консультациялар, психологическай трениннэр, ыал кыһалҕатын быһаарыыга кэпсэтиилэр, оҕо иитиитин араас хайысхалаах боппуруостара, бэйэ-бэйэҕэ сыһыаҥҥа араас таһымнаах дьарыктар, тестирование, оонньуулар сылы эргиччи ыччакка ананан ыытылыннылар. Ону кытта субсидия, сир, дизайн уо.д.а. боппуруостарыгар консультациялар босхо бэриллэллэр. Сыллааҕы үлэни түмүктүүр күҥҥэ республикаҕа 4000-нан төрөөбүт кырачаан Егор дьиэ кэргэнин – Анастасия, Олег Залицкайдары, 60 сыл бииргэ олорбут Матрена Прокопьевна, Иван Афанасьевич Семеновтары бриллиант сыбаайбаларынан чиэстээтилэр. Республика Ил Дархана Егор Афанасьевич Борисов аатыттан үбүлүөйдээхтэри СР Правительствотын председателин солбуйааччы М.Д.Гуляев, ону таһынан СР Правительствотын иһинэн үлэлиир ГТАС управлениетын салайааччыта С.А.Филиппова, Дьокуускай куорат баһылыгын солбуйааччы Е.И.Евсикова, «Россия Ийэлэрэ» Бүтүн Россиятааҕы общественнай хамсааһын СС салаатын председателэ П.П.Борисова, Ыччат уонна дьиэ кэргэн политикатын министерствотын отделын начальнига О.П.Шилова бэйэлэрин истиҥ эҕэрдэлэрин тиэртилэр.

«Эдэр ыал оскуолытын» үлэтин чэрчитинэн ыытыллар бары хамсааһыҥҥа олус көхтөөхтүк кыттыбыт, көмөлөспүт бастыҥ дьоммутугар Елена Тролуковаҕа (гинеколог-бырааска), Варвара Поповаҕа (ДьТХТ иитээччитигэр), Саргылана Михайловаҕа (ГТАС управлениетын отделын начальнигар), «Россия Ийэлэрэ» хамсааһын СС салаатын председателэ П.П.Борисова Махтал суруктары туттартаата.

Оскуола филиаллара Чурапчы, Мэҥэ Хаҥалас, Амма, Сунтаар, Горнай, Бүлүү, Үөһэ Дьааҥы, Уус Алдан улуустарыгар ситиһиилээхтик үлэлииллэр. Оскуола эдэр саҥа тэринэн ыал буолар дьоҥҥо туһата, көмөтө-ньымата үтүмэн буолан үөрдүөҕэ, үгүс бигэ туруктаах ыал баар буолуо диэн эрэлбит улахан.

«Россия Ийэлэрэ» Бүтүн Россиятааҕы общественнай хамсааһын СС салаатын председателэ П.П.Борисова Е.Н.Тролуковаҕа Махтал Грамота туттарар

Залицкайдар дьиэ кэргэннэрэ

Матрена Прокопьевна, Иван Афанасьевич Семеновтар

«Россия Ийэлэрэ» Бүтүн Россиятааҕы общественнай хамсааһын СС салаатын председателэ П.П.Борисова В.И.Поповаҕа Махтал Грамота туттарар

Редакцияттан: Биһиги сайтпыт редакторын Варвара Иннокентьевна Попованы уонна бу тэрээһин бары кыттыылаахтарын үрдүк наҕарааданан итиитик-истиҥник эҕэрдэлиибит уонна өссө үрдүк ситиһиилэри баҕарабыт!