Ытык иэс

Сахалыы, сүөгэй үүттээх, хоп хойуу чэйдээх
Минньигэстик астаан, остуолга олордон,
Күн аайы сылаастык маанылаан,манньыйан
Өрүүтүн күндүлээр күн күбэй ийэҕин.

Кырдьаҕас киһиэхэ истиҥник мичээрэ
Эйэргээн кэпсэтэн үйэтин уһатыан.
Ып ыраас, сымнаҕас, сып сылаас ороҥҥо
Эн дьолуҥ буолуоҕа бүөбэйдээн сытыарыан.

Кэрэни кэмчилээн төрөппүт ийэҕин
Хоргутар,хомотор, ытатар буолумаар.
Кэрэмэс эн иэйииҥ,бүгүҥҥү кыһамньын
Эргиллиэ кэнэҕэс үтүөнэн бэйэҕэр.

Аламай күн курдук алгыһа тиийиэҕэ,
Эн ийэҥ махтала, сүрэҕин сылааһа
Хайаан да төннүөҕэ, эйиигин үөрдүөҕэ
Ол курдук олохпут төлөһөр, эргийэ…