Тыллыах, ньургуһун

Кыһыҥҥы тымныыны тулуйа
Харалдьыт хаардарын хаһыйа,
Кэллибит ол дьоллоох түгэҥҥэ
Көрсүһэр бу сааскы үөрүүгэ.

Тыллыахха, ньургуһун, ыллыахха
Сааскы бу кэрэҕэ кыттыһыах,
Хаамсыахха, сэгэриэм, ыллыахха
Харалдьыт симэҕин ситэриэх.

Ахтылҕан кынаттаах көтөрдөр
Эргиллэр кэрэтин билбиттэр,
Төрөөбүт дойдуга тапталы
Эгэлгэ ырыатын туойбуттар.

Ыллаһыах, ньургуһун, ыллаһыах
Уһуктар кэмнэри уруйдуох,
Сипсиһиэх, сэгэриэм,
сипсиһиэх
Тыллар бу кэрэлиин куустуһуох.

Сибэкки кэрэтин симээри
Алааспыт лыахтара күөрэйбит,
Сааскы бу күннэри хоһуйа
Күөрэгэй чыычаахпыт ыллаабыт.

Тыллыахха, ньургуһун, ыллыахха
Сааскы бу кэрэҕэ кыттыһыах,
Ыллыахха, сэгэриэм, хаамсыахха
Харалдьыт симэҕин ситэриэх.