Араадьыйа күнүнэн!
Ыам ыйын 7 күнүгэр Араадьыйа күнүн бэлиэтиибит. Саха араадьыйата, кырдьык, киһини эрэ кэрэхсэтэр, үөрдэр, истээччилэрин кэрэҕэ умсугутар, иитэр, элбэх сонуну күнтэн күн кэпсии турар. Эҕэрдэлибит!
Мин Саха араадьыйатын олус диэн сэҥээрэ истэбин. Үгүс биэрии киһи билиитин хаҥатар, ис иһиттэн дириҥ ис хоһоонноох тиэмэлээх буолар.
Ону тэҥэ урааҥхай удьуорун кутун туппут ылбаҕай ырыалары киэҥ эйгэҕэ таһааран, уостан түспэт ырыа буолан көтөллөрүгэр олук уураллар. Тус бэйэм син хаста да араадьыйаҕа араас темаҕа тахса сырыттым, ырыаларбын ыыттым.
Саха араадьыйатын бары үлэһиттэригэр: “Аны да үүнэ-сайда, чэчирии туруҥ!” — диэн ис сүрэхпиттэн эҕэрдэбин этэбин!
