Евгений Евтушенко сырдык кэриэһигэр

Поэт Евгений Евтушенко 60-с сылларга

Саханы үрдүктүк тутаҥҥын
Сааһылаан бэркэ да саҥардыҥ,
Киһилии тыллары тиһэҥҥин
Кими да умнубат эбиккин.

Норуотуҥ аатыттан билинэн
Нохтолоох сүрэххин арыйдыҥ,
Баар эбит дьаһааҕы Эн сирэн
Бу баары баарынан айдаардыҥ.

Омуккун бүтүннүү итинэн
Олоччу Эн үөһэ күөрэттиҥ,
Кэлэйбит санааҕын билинэн
Кэскилгин кэҥэтэн кэбистиҥ.

Батталы баарынан этэҥҥин
Барыбыт сүрэҕин долгуттуҥ,
Кырдьыгы сирэйгэ этэҥҥин
Кытаанах тылынан доргуттуҥ.

Анаарбыт эбиккин чахчы да,
Алмааспыт- харахпыт уулара.
Анаабыр, ньурбалар суоллара
Адьаһын үөрдүбэт буоллулар.

Саас дьикти салгынын сытыныы
Саҥалыы санаалаах эбиккин,
Ытыллар маҥан хаар тыыныныы
Ып- ыраас дууһалаах эбиккин.

Дойдубар, дьоннорбор тапталгын
Дорҕоонноон доргуччу эппиккин.
Эн өрүү күүтүүлээх ыалдьыккын,
Эн дьиҥнээх киһигин, бэйиэккин.

Барбытыҥ да иһин Эн бааргын,
Бар дьонум өйүгэр хаалбыккын.
Өлүөнэ Эбэкэм уутугар
Өлбөөрбөт дэп- дьэҥкир таммаххын.

Саргылаах доҕордуу санааҕын
Сахалар умнубат буолуохпут,
Хаһан да Эн сырдык дууһаҕын
Ханна да уруйдуу туойуохпут.

02.04.2017с.

Редакцияттан: Поэт Евгений Евтушенко 2017 с. муус устар 1 күнүгэр Америка балыыһатыгар киирэн, биһиги кэккэбититтэн туораата. Саха сиригэр хаста да кэлэ сылдьыбыта. Кини туһунан кылгасытык манна ааҕыахха сөп.