«Марфа» – улахан өйдөбүнньүк кэнсиэр
Кулун тутар 31 күнүгэр саамай хотугу бриллиантовай циркэҕэ сахалыы циркэни төрүттэһээччи Марфа Петровна Расторгуева айар суолугар анаммыт улахан өйдөбүнньүк кэнсиэр ыытылынна.
– Сахалыы эстрада баар буолан саха циркэтэ тэриллибитэ, – диэн бэлиэтээтэ ырыаһыт убайа, саха эстрадатын аксакала Юрий Платонов.
Айар үлэлэрин суолугар Марфа Петровна үтүө сабыдыалы, үтүмэн көмөнү кэмигэр оҥорбутун махтана ахтан аастылар: Уля Сергучева- Күннэй, Аграфена Кузьмина, Елизавета Романова, Евдокия Ларионова, Владимир Заболоцкай, Иннокентий Лебедев- Лоокуут, Валентина Чиркова, Виталий Андросов, Олимпия, Сахая, Александр Бурнашевтар, «Чороон» бөлөх солиһа Владимир Еремеев, «сүрэхтэринэн көрөр» Роман Винокуров, Кирилл Моисеев, Айыллаана Степанова, Москваттан Юрий Никулин аатынан циркэ артыыһа Дмитрий Чернов уо.д.а. Дьоно Фекла, Петр, Екатерина Колесовтар, Александра Егорова, Анастасия Стручкова, клоуннар Ростик уонна Сашуля, Москваттан Никулин циркэтин артыыһа Дмитрий Чернов, циркэ балета, оркестра олус сылаас тыыннаах киэһэни саалаҕа лыык курдук мустубут дьоҥҥо бэлэхтээн Марфа Петровна олус чаҕылхай, барытыгар бастакы сылдьыбыт оруолун өссө төгүл итэҕэттилэр. Кини бар дьоҥҥо анаммыт олоҕор саха норуотугар эстрада уонна циркэ үөскээн сайдыытыгар сүҥкэн кылаатын көрдөрдүлэр.
Ахтыы киэһэҕэ Румянцев аатынан циркэ уонна эстрада государственнай училищетын директора Валентина Савина, Россия цирковой үлэһиттэрин бэрэссэдээтэлэ Евгений Биляуэр, Россия цирковой үлэһиттэрин солбуйааччы Григорий Островскай, Латина куорат (Италия) Аан дойдутааҕы циркэ фестивалын президенэ Фабио Монтико, Беларуссия циркэтин директора Владимир Шабан, жонглёрдар Аан дойдутааҕы ассоциацияларын Бочуоттаах чилиэнэ Сергей Игнатов, Хабаровскай куорат циркэтин дириэктэрэ Владимир Вишневскэй бу ахтыы киэһэтигэр кыттыыны ыллылар.
Марфа Петровна үлэлээбит үлэтин, олорбут олоҕун туһунан сиһилии кэпсиир кинигэ тахсарыгар баҕа санааларын, эрэллэрин эттилэр. Саамай хотугу бриллианнаах циркэ илэ чахчы бриллиана – Марфа – биһиги оҕо сааспыт эрчимнээх ырыаһыта сүрэхпитигэр өрүү эдэр, кыраһыабай, дьулуурдаах, эрчимнээх буолан хааллаҕа…
