Күн да күн

Күн да күн күлүм күлбүт,
Кууһа, кууһа уохтаахтык уураабыт
Тоһуйа,тоһуйа сылаастык сыллаабыт,
Сүрэҕим үөрдэ толугуруу мөҕүстэ
Иэдэһим итийдэ имнэрэ тэтэрдэ.

Күн да күн күлүмэ күүһүрбүт,
Ириэрэ, ириэрэ үрүччэни ыллатта,
Имэрийэ,имэрийэ күөҕү көрдөрдө,
Иэйиим миэнэ уһуктан ылласта
Имэҥнээх үөрүүттэн көҥүлү көрдөстө.

Күн да күн ырыаны ыллаата,
Чаҕылла,чаҕылла чалбахха оонньоото,
Чэмэлийэ, чэмэлийэ чараҥҥа үҥкүүлээтэ,
Чээн, кэрэтиэн чыычаах ылласта
Чэ эрэ, диэбиттии ньургуһун кыттыста.

Күн да күн сааскы күлүмэ,
Күлсэ,күлсэ аргыс хаамта,
Күөрэйэ,күөрэйэ көҥүлү уруйдаата
Кэскил симэҕэ кэлиэҕин кэпсээтэ
Кэнчээри күөҕү сылааһынан угуттаата.