Санаакам

Ардыгар, доҕоттор,
Соноҕостой санаакам
Сиэллэригин харбаары
Кутуругар иилистэн —
Күүгэн алла сиэлэбин…
Ардыгар…
Ардыгар!

Ардыгар, доҕоттор,
Сулустарга саалланнар
Сындыыс буолан тохтубут
Ырбыт санаам кыырпаҕын
Ырыа гынан ыһабын…
Ардыгар…
Ардыгар!

Ардыгар санаакам
Оргуйаахтыыр олохпут
Оломнорун булаары,
Сүүрүк хоту түһүнэн
Сундулуйан ылбахтыыр…
Ардыгар…
Ардыгар!

Ардыгар санаакам,
Дьэбэрэҕэ батыллан —
Дьүдьэйээхтээн хаалаҥҥын,
Уохтаах ууга умсаҥҥын —
Умуллуоххун саныыгын…
Ардыгар…
Ардыгар!

Ардыгар мин санаам
Үрүмэччи үөрүнүү
Үрэл-тарал ыһыллан,
Симэх оттоох сыһыыга
Сылайаахтаан сууллаахтыыр…
Ардыгар…
Ардыгар!

Үксүгэр, эн иһит!
Сыһыйбатах санаакам,
Сүүрүктэри өксөйөн,
Күн төрүүр хайатыгар
Кылааннанан кылбаҥныыр!
Үксүгэр!
Үксүгэр!