Сунтаарга «Үҥкүү өрөгөйө»

Сунтаарга «Үҥкүү өрөгөйө» улуус бастыҥ үҥкүү коллективтарын көрүү күрэҕэ олус бэркэ, ситиһилээхтик ааста.

Махтал буоллун бастатан туран үҥкүүлэри туруорбут СР культуратын туйгуна Софья Валентиновна Николаеваҕа уонна, биллэн турар, нэһилиэк бастыҥ үҥкүүһүттэригэр. Хас да коллектив баарыттан «Иэрэгэй» үҥкүү бөлөҕө («Саламалаахтар») – 3-с степеннээх диплом, «Туус Кэнэли» үҥкүү бөлөҕө («Чаппараахтар») – 2-с степеннээх диплом, «Бэс чагда» үҥкүү бөлөҕө («Узбекский танец») – 2-с степеннээх лауреат, «Сахам алаадьыта» үҥкүү бөлөҕө («Далбар Хотун үтүлүгэ») – 1-с степеннээх лауреат буоланнар 10000 суумалаах харчынан бириэмийэ ыллылар.

Үҥкүүгэ  9 саастарыттан 65  саастарыгар дылы 60 киһи хабылынна. Бу тэрээһин олоххо киирбитэ 1 сыл буолла. «Үҥкүүлээ, Туус Кэнэли» проект чэрчитинэн  тэриллибитэ, автор ҮРДЭЛ-2017  ырыа күрэҕин кыайыылааҕа, СР  культуратын туйгуна,  Анна Тотонова.

Онон дипломант уонна лауреат буолбут үҥкүүһүттэр бөлөхтөрүн кэнсиэрин сотору кэминэн кэтэһэбит.